ភ្នំពេញ៖ ក្រសួងការបរទេសកម្ពុជាបញ្ជាក់ថារាជរដ្ឋាភិបាលប្រកាន់ខ្ជាប់ជានិច្ចនូវ គោលនយោបាយចិនតែមួយ ហើយបានចាត់ទុកបញ្ហានានាពាក់ព័ន្ធ ហុងកុង តៃវ៉ាន់ ទីបេ និងស៊ីនជាំង គឺជាកិច្ចការផ្ទៃក្នុងរបស់សាធារណរដ្ឋប្រជាមានិតចិន ដែលមានសិទ្ធិអធិបតេយ្យលើដែនដីទាំងនោះ។
ក្នុងសេចក្ដីប្រកាសព័ត៌មានចុះថ្ងៃទី៣ ខែសីហានេះ ក្រសួងការបរទេសបានឱ្យដឹងថារាជរដ្ឋាភិបាលកម្ពុជាកំពុងតាមដានយ៉ាងយកចិត្តទុកដាក់សភាពការណ៍វិវឌ្ឍន៍ថ្មីៗ នៅច្រកសមុទ្រតៃវ៉ាន់ និងបានបង្ហាញនូវការព្រួយបារម្ភចំពោះការកើនឡើងនូវភាពតានតឹងថ្មីៗ នៅច្រកសមុទ្រតៃវ៉ាន់ និងស្នើសុំឲ្យគ្រប់ភាគីពាក់ព័ន្ធគោរពចំពោះកិច្ចព្រមព្រៀងទាំងឡាយដែល ត្រូវបានចុះហត្ថលេខារវាងសាធារណរដ្ឋប្រជាមានិតចិន និងសហរដ្ឋអាមេរិក ដូចដែលមានចែងក្នុង សេចក្តីថ្លែងការណ៍រួមនានាកន្លងមក រវាងភាគីទាំងពីរ។
ក្នុងសេចក្ដីប្រកាសនោះលើកឡើងថា៖ «រាជរដ្ឋាភិបាលកម្ពុជា សូមអំពាវនាវឲ្យភាគីពាក់ព័ន្ធទាំងអស់ស្វះស្វែងរកដំណោះស្រាយប្រកបដោយ សន្តិវិធី រក្សាស្ថានភាពដើម និងចៀសវាងការបង្កហេតុ ដើម្បីបុព្វហេតុនៃសន្តិភាព ស្ថិរភាព វឌ្ឍនភាព និងវិបុលភាពនៅក្នុងតំបន់ និងពិភពលោក»។
កាលលើកឡើងរបស់ក្រសួងការបរទេសនៅពេលនេះគឺបន្ទាប់ពីដំណើរទស្សនៈកិច្ចដ៏សែនចម្រូងចម្រាស់របស់លោកស្រី ណាន់ស៉ី ប៉េឡូស៉ី ទៅទឹកដីកោះតៃវ៉ាន់នៅយប់ម៉ោងប៉ុន្មាន ៩កន្លះយប់ ថ្ងៃទី២ ខែសីហា ឆ្នាំ២០២២ ម្សិលមិញដែលបង្កការខឹងសម្បារជាខ្លាំងពីប្រទេសចិនដែលថាអាមេរិកបានរំលោភដែនអធិបតេយ្យភាពខ្លួន៕
